好戲派的美魔女蘇玉華，同「劇團王子」潘燦良拍拖逾20年，終於等到男友跳入視圈，憑《來生不做香港人》一劇成名，即開口肯嫁。日前下午，唔使開工的模範女友蘇玉華，零妝陪男友在中環high tea睇書，備戰新舞台劇。只見男方掛住鋤書；女方靜候玩手機，唔敢打擾。二人「靜音」對坐成個鐘，才有講有笑走人。最後，阿蘇密封塊面坐上男友的「黃色戰車」綿羊仔，浪漫遊車河返西貢愛巢。
48歲的蘇玉華，多年前與同係話劇發燒友的潘燦良（燦Sir）一拍即合。前年，阿蘇自爆燦Sir一三年在日本求婚，女友終於say yes，仲話唔排除旅行閃婚！可惜講足兩年，都未有婚訊。早前，兩人情侶檔演出話劇《狂揪夫妻．二度勁揪版》，接受訪問時又改口風，女方先話「唔會做大龍鳳」搞婚禮；男方就話「一切已ready，但未plan」。加上今年初阿蘇喪父，睇怕二人喜事，又要押後！
惡補等演出
上周下午，阿蘇和男友連體出動去中環歷山大廈的咖啡店休閒high tea。戴帽兼素顏的蘇玉華保養得宜，無乜皺紋、白滑肌膚絕不比後生女輸蝕。而同樣戴帽的潘燦良就一味低頭睇書，皆因近日他要備戰演出舞台劇《親愛的．胡雪巖》，當日「出城」都帶埋一套三冊的《胡雪巖》，惡補歷史。「老夫老妻」同居多年，早已有默契，眼見男友專心鋤書，阿蘇全程默不作聲飲啡玩手機，悶悶地就鬆弛吓肩頸和雙手，啟動靜音mode，唔介意悶坐。
無聲成個鐘，睇書睇到頸梗的燦Sir終於抬頭同女友吹水，同時亦慢慢扭動頭部，鬆弛一下。阿蘇見到男友慢動作轉頭，發出少女式甜笑，拍拖咁耐，都好冧對方！兩人吹水幾分鐘，就行去附近取車。當日燦Sir慣性揸部Honda Forza MF06黃色綿羊仔載女，見阿蘇熟手戴上裝備，綁上口巾，再戴上墨鏡和西瓜皮頭盔包到冚，以免食塵。然後輕鬆跳上「戰車」，浪漫飛車返西貢同居竇。
採訪 : 梁志明
↧