踏入九月開學日子，肯定是做父母最忙碌的時間，作為明星名人一樣唔例外，為了星二代未來着想，星媽個個未雨綢繆，校服、文具和鞋仔，這些基本嘢當然唔少得，最重要是未來升學方向及平日教仔秘方，她們早已心中有數。今次就搵來諸葛紫岐（Marie）、羅敏莊（Mimi）、楊思琦、歐陽妙芝和陳倩揚幾個星級「索媽」，等佢哋同大家分享一下，準備開學的心得，以及獨門教仔秘方。採訪：杜淑霞、方騫平、李佩儀 攝影：李權威、李維隆
場地：IL COLPO PLATNUM(楊思琦)、
marcha(羅敏莊)
諸葛紫岐 不做怪獸家長
身兼娛樂公司老闆的諸葛紫岐（Marie）跟丈夫薛嘉麟的囝囝「冰岐麟」華韜（Arthur）今年升讀K1，兩公婆以接棒形式親到幼稚園接送。日前Marie帶同家傭現身銅鑼灣學校接放學，兩歲九個月的「冰岐麟」彈彈跳心情大好，似乎好適應校園生活。見囝囝開心，廿四孝媽咪就帶寶貝仔去附近商場添置兒童故事書。Marie指兒子愛返學，老師都大讚Arthur聰明，「佢識廣東話、國語同英文，仲學緊法文同日文。我哋兩公婆唔係怪獸家長，從來冇逼佢學嘢，唔想佢恐懼。之前慶祝結婚周年一家去巴黎旅行，之後佢就要求學法文。至於學游水、鋼琴同小提琴都係佢興趣。」但兩公婆要求兒子嚴守生活規律，放學返家即沖涼吃飯午睡，然後學游水再到會所玩，晚上不能看電視，只可在父母陪同下睇新聞報道，間中可玩平板電腦，但預設時間上限。食物以有機為主，不能吃糖果零食及飲汽水，最多飲新鮮果汁及以獎勵式食無糖朱古力。
羅敏莊 為女升學煩
羅敏莊（Mimi）和陳國邦囡囡陳禛快將4歲，就讀國際學校K2，這天兩母女去店舖揀返學鞋，陳禛對閃珠片和紅色情有獨鍾，「佢懂事以嚟就自己襯衫，近期鍾意公主款式，但呢啲咁搶眼嘅佢只係去街着，返學會揀平實款，我冇教過佢，佢好有自己主見同想法。」Mimi最近忙為陳禛升學問題煩惱，「佢讀嗰間學校雖有小學部，但好多人爭，未必可直升，學校開始報小一，其他家長教我要第一時間填好申請表，寄晒全部資料去，仲要報多幾間，雖然我不嬲唔跟風，但老公提我『你唔跟住做，阿囡讀唔到好學校，將來或會後悔。』我唯有照做囉！呢排真係好似考試咁緊張。」
楊思琦 幫女補中文
楊思琦的4歲囡囡楊卓穎（Krystal），就讀國際學校K2，由於大部份物品可重用，只需帶Krystal去剪髮準備開學。思琦笑言囡囡似她貪靚，「我細個都係貪靚留長髮，佢似足我！今日幫佢剪吓啲髮蔭，唔好遮住對眼，佢鍾意紥馬尾返學。」談到Krystal早前轉校，思琦解釋因囡囡英文天份高，故安排她讀國際學校，「佢返咗學後，講英文多，發音好標準，加上佢性格活潑好動，國際學校教學模式較適合佢，將來都係繼續喺國際學校升學，所以幫佢轉嚟呢間學校。始終我自己讀港式英文，未必教到佢好好嘅英文，但中文應付到，依家會多啲同佢講中文教佢多啲。」
歐陽妙芝 不愛填鴨式教育
名模歐陽妙芝（Christine）育有兩子，11歲的長子方玉丞（Achille）和9歲細仔方玉亨（Atilla）同讀國際學校。她解釋：「我唔Buy填鴨式教育，覺得佢哋依家普通話同英文都講得好標準，學嘅嘢又生活化。」Christine幾忙都愛湊兒子放學，「因為佢哋放學時最多嘢講，唔湊佢哋放學會錯過好多嘢。」Christine每星期都會帶大仔去踢波和細仔學跳舞，她稱自己絕不是怪獸家長，不過每人上兩堂，一個禮拜都要花上四日，絕不輕鬆。未來她希望送兒子到澳洲讀大學，她稱：「想佢哋多啲了解其他地方嘅文化，唔係淨係識得融入香港。」加上老爺奶奶在當地居住可幫忙照顧。
陳倩揚 不望仔讀名校
陳倩揚育有分別5歲大仔羲廷及1歲半細仔羲穎，開學令她生活更充實，羲穎周一至五朝早8點半返playgroup，她風雨不改揹住細仔迫港鐵去九龍塘，再徒步10多分鐘返學，放學後回家安頓好細仔，隨即又要送羲廷坐校巴。而大仔升K3好適應學校生活，：「佢6月出生，當年得17個月去考學前班，考過幾間熱門幼稚園都唔肯收，唯獨呢間肯收，囝囝鍾意返學，所以N班後唔打算轉校。其實小朋友唔一定要讀名校，我同老公都唔係出身名校，都入到中大啦！佢明年升讀小一，我哋好順其自然，只安排幾間心儀小學面試。」
↧
