諸葛紫岐旗下藝人莊端兒(Xenia)，同張致恒(Steven)拍拖兩年一直高調，早前有報道指35D咪神為事業狠撇男友。日前下午，返內地拍攝半個月的Steven甫返港，即相約女友去銅鑼灣甜蜜遊。Xenia仲一路繞住男友黐到實。二人拍拖斷正，被記者追問是否翻撻時，Steven扮傻說：「呢啲嘢大家想係咪係囉！」反而女方繼續避忌，似怕戀情曝光，影響正上位的事業呢！採訪 : 李權威、李佩儀
一三年珠寶小姐季軍莊端兒，去年簽約諸葛紫岐的娛樂公司，拍戲又出噴血寫真。現年34歲的她，前年與31歲張致恒展開姊弟戀。據悉，二人一直愛得黐纏，不過女方見事業起飛，不惜轉玩地下情。日前下午三時許，瘦身成功的莊端兒，超淡妝現身銅鑼灣時代廣場。當日有米咪神身穿露膊連身裙、腳踏高跟鞋，沿路都繞住戴帽Steven連體行。Xenia打扮高貴大方；反而撈極唔紅嘅Steven，t-shirt波鞋牛仔褲，casual wear與打扮端莊的女友，有點格格不入。二人繞手行往櫃員機排隊過數，最後雙雙行出商場。
死撐唔認
記者上前採訪，拍拖斷到正，Xenia嚇得傻笑低頭猛撳手機，而Steven就笑笑口，舉V扮鎮定。問二人是否翻撻？兩人異口同聲話約了朋友，稍後去食嘢，鬼咁夾！再問早前的分手傳聞，現階段是冷戰過後？Steven搶答：「新聞嘅嘢，有乜所謂！無所謂O架！大家鍾意睇新聞咪睇囉！(情侶關係？)唔講咁多嘞！大家鍾意我哋咩關係咪咩關係。」莊端兒亦幫口：「其實我一直無講過任何嘢。」再問二人剛才繞手晒恩愛，Steven竟縮一縮膊頭扮傻說「有咩！」問兩人是否視對方為結婚對象？拖友似一早夾定口供，齊聲表示工作行先，超級啱key，想扮分手都無人信啦！
↧