飛達帽業（1100）嘅事頭婆顏太好開心咁話，上市16年來第一次拎花紅500萬，不過交稅都交咗百萬。三年前喺孟加拉開廠，食唔慣當地嘢，每次去帶埋成箱豆豉鯪魚罐頭、日日食腐乳榨菜嘅苦日子已經過去。現時孟加拉生意都唔錯，經囝囝提醒後，話自己咁辛苦打拼，業務上咗軌道，應該要獎勵一下自己，分吓花紅。由舊年尾開始，顏太個個月都有去短途旅行，歎吓世界，唔單只自己去，今年仲請埋成班同事去沖繩！
講番囝囝，顏太直言好恨抱孫，話個仔29歲仲未結婚，真係陰公！教佢揀老婆唔使咁靚，仲笑住自嘲，阿媽都唔靚。她仲透露埋理想媳婦嘅條件，好鍾意香港女仔，夠踏實唔虛榮。
聽聞顏太嘅大仔高大靚仔，絕對係城中筍盤，使咩擔心。下次帶埋個仔出來，我哋幫下手，絕對係準媳婦由中環排去銅鑼灣。
拍住賞新玩法 幫仔女理財
手機支付喺本港玩法愈嚟愈多，其中香港電訊（6823）「Tap & Go 拍住賞」手機支付結合子女財務管理嘅玩法，一定大受「關心子女一舉一動」嘅家長歡迎。「拍住賞」新推PayMaster功能，每個家庭家長最多可以掌管五個子女帳戶，以後不但俾零用錢只需用電話過數就搞掂，更厲害係子女使錢嘅時間、地點同金額都通通有晒紀錄。
計我話，呢個功能更適合各位「愛妻號」老公，事關每位老婆最驚老公「有錢就身痕」，所以如果以後各位「愛妻號」想俾到最大安全感俾老婆，可以考慮下將成分糧「上繳中央」之外，再主動以「拍住賞」帳戶拎零用錢，每筆使費行踪有晒紀錄，以後老婆實錫晒你。
另外，「拍住賞」亦新增自己設計卡封面嘅功能，可以將自己嘅相片或網上圖片拎去指定csl.同1010分店製作，情侶間以後晒恩愛又多一個方法。
高瞻
↧