皇朝傢俬（1198）主席謝錦鵬同傳媒食飯，席上提起品牌第四代代言人林志玲，即刻四萬咁口，話好滿意佢表現。佢話搵代言人呢件事好科學，收集咗旗下經銷商意見，大家都一片丹心向住志玲姐姐。
雖然代言費幾多就無可奉告，但志玲姐姐喺大中華嘅人氣咁勁，相信都用咗唔少錢先招攬到女神返嚟。謝錦鵬就話，代言費一句講晒係「值嘅！」公司同佢簽咗四年約，啱啱只係過咗一年，希望長期合作咁話！佢分享到今年3月嘅傢具展覽會，會上展出最新系列產品，加盟商啱心水就會認投開舖，今年內都會開過百間加盟店。
林志玲當然有出席撐場啦，謝錦鵬話林志玲非常友善熱情，喺台上好似搵緊Mr. Right咁，直頭畀人「家的感覺」。嘩！睇嚟在場嘅人都拜倒喺女神魅力之下，暈晒大浪！咁又係嘅，賣得傢俬都會想多啲人成家立室，生多個小朋友至少都要買多張牀。話時話，二孩政策都幫唔少傢俬銷售，難怪公司中期業績都有顯著改善。
其實皇朝喺品牌推廣方面都落唔少功夫，上個月就推出喺中國高速鐵路京廣線行駛嘅皇朝傢俬專車，仲喺京滬線列車入面同埋16個火車站搞獨家休息室，喺範圍內大賣廣告，咁咪有林志玲陪住搭車囉！
騰訊「張志東」歎見財化水
股王騰訊（700）股價又再破頂，噚日收市報215元，收市市值首次企穩喺2萬億以上。騰訊五虎將、創辦人之一嘅張志東，目前持有6500萬股騰訊股份，市值近140億元，就梗係歡歡喜喜。但命運最愛捉弄人，有人歡喜就有人愁，另一位喺騰訊工作逾十年，同樣叫張志東嘅資深員工，就冇咁好彩，近日仲大歎因為冇買騰訊長揸，一億蚊見財化水，實現唔到成為首富路上嘅「小目標」。
原來呢位叫張志東嘅員工，喺2005年加入騰訊，當時騰訊股價只係8蚊，如果一折五計即係1.6元。佢話如果當時買入80萬元，即係10萬股騰訊股份長揸，咁佢現時就有超過一億。難怪呢位資深員工喺微博發文指︰「一直在騰訊這家傳奇公司工作，目睹了傳奇的過程。卻錯過了唯一實現『小目標』的機會」。提番大家，1億元人仔係小目標，係中國首富王健林講嘅。
高瞻
↧