三年抱三的陳豪和陳茵媺(Aimee)，先後誕下大仔陳梓燁(Aiden Joshua)和次子陳浩鋒(Nathan Lucas)後，今年四月終於追到個女，三個夠晒數。結婚生仔快過打針，貴為06年港姐雙料冠軍的Aimee，昔日女神身材大走樣。日前下午，全身圓碌碌的甜心媽咪撇下三個小寶寶，獨自去銅鑼灣Shopping。難得大解放，黑超靚媽行足3個鐘瘋狂購物。試鞋其間，「肥媽」下盤現形，39吋巨躉乍現。幸福星媽好大犧牲O架！採訪 : 張詠森、李維隆
早前，陳豪一家五口總動員現身中環，當日B女亦首度曝光，Camilla雙眼水汪汪，嘴仔細細，手臂腳瓜似「節瓜仔」圓碌碌，勁可愛。二十四孝老竇就拖一個抱一個，一家溫馨放閃。
日前下午二時，甜心媽咪Aimee難得有私人時間出關唞唞氣，現身銅鑼灣利園瘋狂shopping。當日零妝、明顯未修身的人妻戴上墨鏡，身穿闊身衫褲，再拎個至愛品牌Hermes的粉紅色garden party bag出巡。她先到Roger Vivier睇鞋，一口氣揀了幾對品牌的classic大扣款，方便湊仔專揀平底。起身照鏡時，靚媽單手「戚起」條闊褲睇鞋，點知籮形盡現，豪華臀現晒形！目測最少39吋，身材大咗兩個碼！
大碼身形
其後人妻開始主攻BB嘢。在mothercare買BB睡袋、夜燈和碗仔等，之後再去另一間童裝名店，幫Camilla小公主揀粉紅色口水肩。幫小朋友掃完貨，靚媽咪又再睇衫，連行兩間中價服裝店，買過批大碼衫。開心shoppong近三個鐘，Aimee滿載而歸，問她不用湊仔女？她甜笑說：「要O架！」再問丈夫唔見影、她會否復出等？她講幾句BB話又鬼馬做手勢，示意封嘴！最後問到兩兄弟愛錫B女嗎？她即開心回應：「錫呀！無爭嘢玩。」始終有仔女萬事足！
↧