澳門博彩收入連跌26個月之後，8月終於止血，錄得按年1.1%升幅 。銀娛（027）主席呂志和（見圖）接受外電訪問嗰陣，徇眾要求幫博彩業把把脈。佢即刻大好友上身，話博彩業已見底，但係咪真正復甦就言之尚早。
呂志和話需要多兩年時間睇吓，要睇定啲先知，最差嘅時期係咪已經過去。其實博彩業前景真係眾說紛紜，永利澳門（1128）主席史提芬永利之前都話睇唔透行業發展，澳博（880）執行董事梁安琪就話博彩業進入深度調整期，唔好期望突然急升。行業大方向肯定係向非博彩業務發展。呂志和就表明要求生就要發展中場，策略同澳門政府發展方向一致，由全球最大嘅賭場中心轉型至主打中產旅客的旅遊勝地。
銀娛全靠澳門銀河二期及澳門百老匯搶唔少家庭客，市佔率攀升至23%，超越金沙中國，成為業界龍頭大哥。呂志和提到下一步計劃，未來兩年目標將中場收入提升20%。佢提到以前人人都想要多啲大客仔，但事實係貴賓廳的確少左客。佢哋要提供更多設施去吸引中場客戶，所以公司都打算開設主題樂園及展覽場館。
另外，賭場營運商牌照即將喺2020年到期，佢喺呢方面就回應得好審慎，唔評論獲續牌機會有幾大。佢話續牌留待政府去決定佢哋做得好唔好。
國泰飛機餐 試新派中菜
大家搭飛機成日話無啖好食，國泰航空昨宣佈同主理新派中菜的高級食府卅二公館合作，推出一系列新派中式美食，相信會令不少乘客對飛機餐有所改觀。
新菜式包括由餐廳主廚李文星師傅構思的「醬烤三弄美國安格斯牛肋骨」，選用上佳食材，將牛肋骨過夜醃浸，令牛肉味道有多種層次；亦有選用飛機餐較少見的地道材料，炮製出「慢煮東坡黑豚肉配蘿蔔糕」，用上白蘿蔔糕、麵粉及蝦米等，配上公館著名食材之一的上等黑豚肉，務求令乘客一試難忘。如果要搭長途機，不妨試下「鹹檸檬雞」，由李師傅自家製的鹹檸檬醃雞肉，細意品嚐一種清新帶甜的味道。
由今個月開始，由香港出發的國泰指定長途航班，包括澳洲、歐洲及北美洲航線，將會供應上述多款新菜式，大家記住試吓。
高瞻
↧