曾經因為抑鬱症停工兩年的歌手周國賢（Endy）去年正式重返樂壇，他將於9月25日假灣仔會展舉行一場演唱會。去年9月至今，一年三個騷，對Endy來說好有壓力，距離開show前半個月，他明顯瘦了一圈，訪問當日不停狂飲清水同咖啡的Endy手震震說：「我無刻意減肥，只不過真係無胃口，o依家開始戒食肉又返教會等，壓力大減！」搵到釋放自己的方法係好事，周國賢加油呀！
瘦到變排骨仔的周國賢，好鍾愛自已鋼條身形，他沒有刻意上磅，反正可以預留空間比自己槽肥，即使再落磅都無乜所謂：「其實因為我日頭無乜胃口，最慘夜晚胃口大開可以狂食，唯有忍口齋飲湯。」Endy有一套另類keep fit方法，就係採用黑人鍛煉體能方法做街頭健身：「唔使比會費又可以曬吓太陽同練氣，一舉三得。」
為了減壓，日前周國賢更開始戒肉茹素：「有一段日子我茹毛飲血咁搞到情緒好暴躁，思想唔集中，食素可以淨化心靈，而且我會去教堂同佛堂幫助心境平靜，我相信不論乜嘢宗教都好，都係導人向善。雙管齊下o依家情緒幾好呀！。」
周國賢現正積極備戰演唱會，rundown未度好，透露剛剛才整理好70至80首自己作品，然後將歌曲分類演出，專挑有情意結的歌，好似寫畀讀書時最愛的樂隊AMK的《請讓我回家》及《不一樣的天空》等都會演唱，他說：「之前睇過5人搖滾組合『觸執毛』嘅《樹窿計劃》音樂會，佢哋圍圈背向觀眾對唱好有氣氛，提醒我做演唱會要重返原始以歌會友，唔使搞咁多花臣，連嘉賓都唔使。」
採訪：方騫平 場地：Spark Bar And Restaurant
↧