當年，陳鍵鋒（Sammul）、吳卓羲、林峯、黃宗澤及馬國明有「新五虎」稱號，今時今日走剩馬明，其他全部返內地搵食，最先走嘅係10年約滿TVB嘅陳鍵鋒。拍劇收30萬人仔一集嘅Sammul久唔久返香港約朋友吹水，佢話好鍾意返香港講廣東話。日前下午，就見到佢同女友人喺星巴克飲嘢傾偈，全程動作多多，表現興奮，可以講廣東話對佢嚟講真係好開心。
10年，Sammul北上拍劇，憑內地劇《美人心計》彈起，仲被譽為史上最靚仔皇帝，之後拍《封神英雄榜》擔演姜子牙亦大受歡迎，更曾獲選為亞洲十大男神，聽個名好鬼勁，但香港就無晒人氣。
依然靚仔
香港無人氣有咩所謂吖，拍一套內地劇可以喺香港買一層樓，人氣？食得飽咩？日前，別來無恙嘅佢同女友人喺歷山大廈內嘅星巴克飲嘢傾偈，一個鐘內男方發言量佔八成，邊飲邊手郁郁，講得好投入，傾夠就各自離開，拎住環保水樽嘅Sammul行去皇后大道中方向，因為戴咗帽，又或者無乜人識，無乜人理佢，行得好自在。
採訪︰張詠森
↧