16年港男冠軍剛誕生，而05年參加第一屆港男入行嘅黃長興已經係兩位小朋友嘅爸爸，又係一間法國餐廳嘅老闆，雖然演藝事業一般，無所謂啦，家庭美滿更幸福。日前下午，黃長興夫婦丟低三個半月大細囝Tristan同兩歲大女黃晞桐（Paige）及老婆去圓方行街街，黃太負責推裝滿玩具嘅BB車，黃生就主力睇實個女，小妹妹好活潑周圍走，黃生笑咪咪一路望實。
黃長興好勤力養家，為推廣餐廳會去食品節擺攤位幫助宣傳，對於成家等佢養會否開分店賺多啲？黃長興話：「有諗過，不過餐廳嘅嘢主要畀拍檔搞，我要拍劇，又想多啲時間陪屋企。」講到細仔O依家三個半月大，長興一副冧樣咁話：「佢好靚仔，日日抱住佢又攬又錫，我開頭以為生女做爸爸先會咁鍾意，原來仔都會。」
活潑的潮B
日前下午三點，黃長興放低心愛嘅囝囝同老婆及大女去圓方食Lunch同行街，小妹妹出街鍾意拎好多公仔，而公仔就放喺BB車，推車責任由媽媽負責，至於穿BAPE KIDS童裝，好有型嘅潮B Paige勁活潑，喺商場周圍走，時而奔跑時而蹲低，老竇雙眼無離開過囡囡，一家三口喺圓方Window Shopping，行夠睇夠就去接待處吸印仔再去停車場駕車離開。
採訪：李權威
↧
