石詠莉早前明明宣佈明年披嫁衣，偏偏又揀呢個時候耗盡大半身家自資出碟開演唱會，那婚事打算搞幾大？啊，那要視乎出碟開騷後用剩幾多銀兩先再算，為了唱歌，石詠莉到底還可以去到幾盡？「其實成張碟由揀歌、傾版權到跑電台都係我同Patrick自己搞掂，演唱會sponsor都係自己傾，我好proud of可以做到！」石詠莉邊說邊對未婚夫報了甜到漏笑容，這次訪問相由鄧健泓親自操刀，角度光位全由他掌控，「上張唱片都係Partick影，佢影相好靚㗎……」其實結婚擺酒大龍鳳，又怎比得上兩個人一條心？
用苦盡甘來形容石詠莉的歌唱事業絕對恰當，九年前搭單式加入Freeze，跟甄穎珊及陳樂榣齊以「整容三嬌」姿態闖樂壇，話題十足，但究竟Freeze唱過咩歌？做過啲乜？冇人會記得，最終Suki靠實力殺出，15年推出第一張發燒專輯《聽聽Sukie's》贏盡銷量和口碑，今年再出碟就順勢開演唱會，Suki坦言造歌影封套、跑宣傳搵sponsor，鄧健泓從沒停過，「有次Patrick同我講對唔住，話其他人有唱片公司promoter跑台（電台），而我就要自己跑，覺得好對唔住我，但我話我好自豪就真，我有能力做到，唔係人人得㗎！」
唱出第三者心聲
說到為演唱會創作的新歌《第三類接觸》歌詞句句入肉，似是唱出第三者心聲，「首歌曲詞全由Patrick寫，唔係要幫第三者發聲，係身邊真係好多呢啲Case，愛係冇錯，關鍵係時間，喺唔適當嘅時間愛上唔應該愛嘅人啫……」唱得咁投入，難免令人聯想到是自身感受，Suki斬釘截鐵表示從沒做過第三者，亦相信Patrick沒這類經驗，她說：「兩個人相處最緊要係溝通、體諒同包容。我哋兩個好坦白好坦誠，第一次單獨約會已講到家庭狀況、感情狀況甚至經濟狀況，再加上我哋興趣真係好相近，呢段感情真係好健康。」
採訪：彭子僖
↧