江欣燕自《女人俱樂部》後相隔兩年再演電視劇《為食神探》，劇中飾演一名被花心老公拋棄，精於數口嘅失婚偵探社社長「秀娜」，當接獲劇本時欣欣都打個突，因為覺得有幾分影射自己，她樂天大笑說：「當時心諗，想點呀你！雖然同真實情節係有出入，但都會將自己心態放大咁演繹出嚟。」她仲自爆同「高仁」鄭子誠拍嗌交戲時仲出埋真火，嗌到連青筋都現埋，投入到七情上面。拍完仲好攰、暈到要人扶住。
相對之下，欣欣話自己個性比「秀娜」溫和得多，就算有情緒都唔會爆到好似癲婆咁，她說：「我同前夫吳積遜冇鬧得咁激，我覺得呢方面應該受父母影響。網民大讚我同阮兆祥擦出火花同埋有戲劇效果，其實父母功不可沒，因為數字係我死穴，現實生活同角色反差好大，所以喺屋企時會拉住兩老幫手對戲，媽咪仲熟到邊追劇邊講得出對白，老人家好易有滿足感。」欣欣大讚祥仔係個好拍檔，有他同場可以一笑解千愁，即使好眼瞓好攰都頂得住。
同前夫完全無聯絡
她自爆跟前夫分開兩年再沒有聯絡，江欣燕笑住形容：「因為兩個人冇小朋友，所以我哋之間再冇任何轇轕。」至於可會尋第2春？江欣燕灑脫地說：「我覺得一個人好自由，我幾Enjoy依家嘅生活，過一啲屬於自己世界嘅快樂生活，一個人去睇戲，完全唔覺沉悶。哈！其實搵男朋友嘅定義係乜先？如果只係照顧生活不如搵個『老細』！如果係搵個我欣賞又有Feel嘅對象，我諗我唔介意接受同性戀。」
採訪：方騫平 場地：The Stadium Bar and restaurant
↧