29歲嘅大台小花樂瞳（Cilla）在剛播完的劇集《為食神探》中雖然只係佔得幾集戲，但飾演滿面汗斑，滿身腥臭味嘅鹹魚妹潘小蓮又令觀眾印象深刻。今次Cilla犧牲色相拍劇，自爆一上妝就要閉關唔想見人，怕嚇親人，對於自己努力工作但外界嘅焦點落喺佢負面新聞上，Cilla愈講愈激動：「身邊朋友有錢，食好嘢去玩預埋我啫，咁我喺社交平台分享旅行相，點解話我專媾富二代男友？究竟我做錯啲乜？」
樂瞳強調自己好用心去演戲，演出前做晒功課鑽研角色，所以先可以咁入戲，並非傳聞中等嫁有米新歡David唔使撈！她笑說：「原來醜角可以受到觀眾注意，早知應該喺10年前殺出呢條血路，我諗星運會暢順好多，不過都希望30歲後喺事業上有新突破，監製不妨搵我嘗試多啲唔同嘅角色。」
識有錢朋友不是罪
對於被指狠飛型男阿希火速轉投有米新歡David懷抱，兩人拍拖短短1個月已經密密孖住出trip兼於豪宅同居，對此，樂瞳有話要說：「我同阿希係因為好多問題而分手，我同David係朋友，呢班朋友好照顧我，喺我公公過身期間一直陪住我。總之o依家係單身，感情嘅事真係唔想多講，我只係想努力做好自己嘅工作。」
樂瞳仲愈講愈激動︰「喺TVB十年嘅辛酸冇人知，銀行戶口得番50元，o依家都係想努力工作賺多小小錢啫，其實我冇話要炫耀，好多人都會識到有錢朋友，點知俾人話我晒命，拜金黐富二代，最離譜話我做小三，連屋企人都成為箭靶，又關佢哋乜事呢？做藝人真係好無奈好灰心，對人歡笑背人愁。」
採訪：方騫平
↧