早前，無線熱播劇《城寨英雄》創收視新高，帶挈埋劇中主角大受歡迎，其中拍電影響朵的功夫小子伍允龍Philip，首次跳入視圈，即憑「貓仔、龍成虎」一角升呢男神兼成功入屋，更與劇中女友「柯德莉」(劉佩玥飾)疑似撻着。日前在美國慶祝39歲牛一的他，早前偕男友人現身尖沙咀一運動舖。成個生日月，Philip緋聞女友阿Moon因忙拍新劇，全程無影，力證男神努力事業外，仲好乖仔專一O架！
入行逾十年，一直以電影為主又不錫身的伍允龍，去年首度殺入公仔箱，處男接拍《城寨》。真功夫拍劇，睇到觀眾嘩嘩聲！亦疑似撮合「柯德莉」和「龍成虎」的「龍玥戀」。早前，Philip終躍身國際，被《天網逆緣》導演佐治諾菲（GeorgeNolfi）睇中，搵佢拍西片《龍之誕生》(Birth of the Dragon)，扮演一代功夫巨星李小龍。月中，伍允龍飛去多倫多電影展出席首映禮，其後順道返芝加哥慶祝39歲生日。
日前晚上8時，伍允龍偕男友人去尖咀北京道的adidas旗艦店Shopping。黑衫牛仔褲波鞋的大隻仔，專睇運動衫褲，閒逛十五分鐘，即有收穫。其間有女fans興奮搵「貓仔」集郵，他態度友善，來者不拒，O氹到班fans好開心。之後男神排隊畀錢，手瓜起的他一邊把玩斜孭袋、一邊睇電視播放的足球片段，睇到入晒神。最後碌卡找數，男神與友人去附近食飯醫肚，再獨自返家。
「滿足呢種關係」
日前，身在家鄉芝加哥慶生的男神接受本報電話訪問時，透露演繹李小龍頗有壓力，但睇完首映後，現場反應熱烈，令他好感恩。再問他生日只與父母和好巴打安志杰一家三口慶祝，忙在港拍新劇《降魔的》緋聞女友劉佩玥有咩表示，Philip強調說：「好多謝大家投入『柯德莉』和『龍成虎』的關係，證明我哋演技和套劇非常成功。但其實我哋真真正正只係朋友。之前宣傳、訪問，我哋因為太投入而玩得顛又放，呢種關係我已經好開心，好滿足。我係單身，感情事等神安排啦！現階段只專心努力工作。」
採訪 : 李權威、林書鉉
↧
