投資銀行同航空公司有咩相似之處？諗真啲，原來兩個行業嘅周期都好相似，一齊好景一齊捱。何出此言？事緣最近有單新聞話，中信里昂要求全球1500名員工放最多10日無薪假，慳番啲成本。放無薪假對香港人來講，尤其係國泰航空員工，都熟口熟面。航空公司成日話，金融界少咗出差，所以頭等同商務客位生意都差晒，賺少咗，唯有平啲推廣商務客位，俾機會成日自由行嘅貴客升格，可以玩得高興啲。
講番中信里昂，自願放無薪假計劃由8月開始，直至明年3月。中信里昂證券、投資銀行、資產管理部門員工，可選擇放5天或10天無薪假。中信里昂喺2003年、2008年、2009年都實施類似措施，要求員工共渡時艱。
禍不單行，外電引述知情人士，話東南亞區內生意縮減，加上內地券商競爭，美銀打算裁減十多名亞洲區內的公司及投行銀行部門高層，節省經營成本，是今年來第二次裁減區內人手。美銀今次裁員對象包括區內投行嘅執行董事和董事，最快可能於周三有所行動。
美銀舊年喺全球合共裁員超過1萬人，今年3月再喺亞洲區至少裁退15名高級銀行家。
其實，華爾街大行唔少都裁過員，高盛日前決定於香港、新加坡，未來數月裁減近30%員工，即約300人。受影響部門包括併購、證券及債務資本市場交易，共90人。
女士揸弗 企業回報勝一籌
一講到大公司CEO會聯想到啲咩？一個西裝骨骨、魅力非凡嘅男士？抑或係巾幗英雄。如果要投資賺錢，大家可能要改變一下呢個諗法喇！
瑞信發表研究報告，再次確認有較多女士擔任決策角色嘅公司，投資回報更好，盈利表現更上一層樓。上禮拜四凌晨聯儲局主席耶倫主持記者會，講解點解唔加息，佢就做咗一個完美示範，將儲局嘅內部矛盾完全化解，而且仲可以將訊息傳畀投資市場，只不過分別在儲局唔係以賺錢為目的啫。
瑞信主席Urs Rohner及哈佛大學公共政策教授暨瑞信董事Iris Bohnet喺報告中指出，搵到確實證據支持女性喺決策崗位上有較高參與嘅公司，股價回報更好，資產負債表都會穩健啲。報告仲話，女性管理層佔多數嘅話，企業成長會比較好，投資嘅現金回報較高，槓桿水平都會低啲。報告仲發現，相比於男CEO，女CEO領導嘅企業股本回報高出19%，真係信不信由你！
高瞻
↧