容祖兒及李克勤日前齊到內地惠州舉行演唱會，強忍腳痛綵排的祖兒，在演出前不慎在家踩中玻璃受傷，到開騷前腳底劇痛難耐，工作人員以燒熱的針尖，助她取出腳底內的玻璃碎，讓她得以專心開騷！
容祖兒和李克勤早前抵達惠州即為開騷進行綵排，祖兒邊跳邊嗌腳痛，原來是她在家打破玻璃杯後，翌日踩了玻璃碎刺入腳底，她忍痛開工數天未有治理，至惠州騷前，腳底嚴重痛楚。
工作人員其後在化妝間，合力捉實祖兒的腳，並用火燒針尖消毒，再由助手操刀為她取出腳底傷口的玻璃碎。祖兒道：「我幾日都話痛，大家可能頂我唔順，突然好多隻手捉住我隻腳，又夾、又放大鏡、又針、又𠝹刀，然後一粒鑽石戒指咁閃嘅玻璃碎就出嚟，終於舒服晒！」
祖兒與克勤開騷的場館要在晚上11時關門，觀眾卻不肯離場，全場站起來狂叫「安哥」，最終兩人冒停止供電之險唱多十分鐘才盡興散場！他們亦將到湛江、深圳、上海和星馬等多地開騷，克勤坦言最想到紐西蘭，笑言對綿羊唱歌，減歌酬也願意。祖兒則希望去荷蘭，因她喜愛的卡通人物Miffy的故鄉就是荷蘭！
本報記者
↧