自從去年擸走商台「叱咤樂壇組合銅獎」後，成軍十年的Dear Jane開始有運行，之後於九展舉行首個演唱會，小試牛刀，座無虛席，反應比預期中更加好。承接聲勢，下個月將於九展再開兩場《Dear Jane哪裏只得我共你LIVE 2016》演唱會，今年因應需求添食多一場。愈嚟愈忙，主音Tim（黃天翱）坦言影響「造人」大計，「雖然我體力旺盛仲係有心有力，但真係冇時間呀。」
Dear Jan除咗忙宣傳同籌備9月演唱會外，又要搞新唱片，新碟預計跟演唱會同步推出。Howie說：「過往創作成日唔太得心應手，但近年嘅靈感好澎湃，創作好多作品」因為好忙，結婚年幾嘅Tim都要延遲生仔大計，Tim笑說：「最快明年年頭先有空檔，時間許可嘅話同老婆Book個Trip去旅行。」Howie繼續玩Tim：「哈！我哋又跟埋去做電燈膽，阻佢哋先。」Nice更爆笑為Tim計埋生仔日子：「年頭造人懷胎10月，咁咪唔可以喺1月出生贏在射精前囉。」Tim對隊友的關心帶點無奈：「計算咁多做乜吖，我同老婆一向都係抱住順其自然態度，完全冇壓力。」
觀眾真金白銀買飛
對於今年再下一城，Dear Jane形容係意外驚喜，最希望好似五月天咁年年開一次Show，Tim說：「因為上次反應好又有好多人錯過咗，所以雖然o依家經濟市道唔好，但公司對銷情仍然好有信心，最感動係個個觀眾都係真金白銀買飛入場，唔係靠送飛，所以現場氣氛就特別好，可能佢哋欣賞我哋對音樂嘅誠意啦，楊洛婷好努力咁同我銷飛，親友夾埋訂咗100張支持我哋。」今次演唱會有別於去年的Band show形式，而係走傳統演唱會模式，每晚仲有3位嘉賓撐場，人選仲係頂級人馬，肯定能給予觀眾一個大驚喜。
採訪：方騫平
攝影：李權威 髮型：Jamie Lee @ HAiR
化妝：Chris Lam 服裝：5cm
↧
