周家怡忙完首次擔正女主角的電影《導火新聞線》，早前搵真銀接拍牙膏廣告，估唔到平日密密實實的她，雖然三點不露，但全裸上陣，睇到網友個個嘩嘩聲，大讚家怡禾稈冚珍珠，身材無得頂。講真，有幾多個天生麗質，要好身材當然要Keep啦！所以日前就撞到家怡素顏單拖，去咗淺水灣喪跑粒幾鐘囉！
剛剛港視發牌又有新進展，特首會同行政會議將港視申請再發還通訊事務管理局處理，未知最終港視個牌會點，但港視確實捧紅了不少藝人，包括孭正《導火新聞線》女主角的周家怡，她更再接再厲演埋電影版，總算捱出頭。
裝備好自己
向來瘦底的家怡，平日鮮有露肉出現，不過唔一定要性感先至被睇中去露，有態度有性格，一樣可以露得好有型㗎！早前家怡就為牙膏廣告，首次全裸演出，但全片三點不露相當唯美，唔單止家怡拍得開心，網友亦睇得過癮。焦點當然是身材，幸好全部報以正評讚家怡：「身材好！」
為了靚靚，除咗出街照鏡，重點當然要保養，家怡都唔例外，日前下午4點幾冇咁曬，她一個人在淺水灣至深水灣的跑步徑來回係咁跑，發現記者即尷尷尬尬咁用毛巾遮面。問到係咪為減肥？仲就答：「就係唔知幾時有工作需要，所以就要保持最佳狀況。」從來都話，機會係留畀有準備嘅人啦！
採訪：張 詠森、李權威
↧