兩年多前，前主播黃紫盈（Connie）轉型做主持及旅遊達人，其間做過唔少司儀工作，她說：「好好彩，從來冇遇過類似蘇永康嘅不愉快經歷，每次出Event都收到合理價，因為前輩教落，每個活動不論係咪慈善性質都會有Budget，純為曝光免費出Event只會令到成個行業唔健康，我唔鼓吹。」
黃紫盈接Show企硬要收錢，但可以因應客戶Budget調整，合作無間的當然有友情價和更大減價空間，她笑說：「如果價值同心目中嘅相差太遠，咪等第日大家價值觀相近啲先合作囉，我只係小角色唔會覺得被侮辱，相比蘇永康咁有知名度，佢心中梗係有個價。總之我唔會免費接Show，就算係善慈善性質都會有車馬費，呢啲Budget係預算之內。其實個個客戶對我都好好，有錢賺同時仲會長期獲服裝、鞋履、護膚品贊助，年中慳返唔少。」
受過教訓學精咗
黃紫盈坦言做司儀曾遇尷尬情況，如在堆滿雜物無處容身的後台等出場，甚至活動中段時無處容身，所以好靠執生。最嬲一次和出版社傾好出一本遊記形式的旅遊書，她還親自出面拍膊頭搵朋友，用友情價拍片及借場配合書本，最後階段出版社額外要求同時攞埋兩者版權，跟她的肖像權有牴觸，結果臨門計劃被拉倒，她坦言有小小愕然更愧對被拍膊頭的朋友，經一事長一智，提醒她積極是好事，但學會日後做嘢小心啲，簽好合約拍了板才瞓身去做，否則白費心血。
採訪：方騫平 鞋履：Zaxy 場地：Madera Hollywood
↧