有說香港人多車多，是個對單車客不友善的城市，但這彈丸之地，依然出了許多單車好手，亦有人愛單車愛到發狂。好像被人稱為香港Fixed Gear（梗牙車）教父的Brian，最近便在中環開設本土首間Cycling Cafe，為的是希望車友有個聚腳點，可以踩車來歎下咖啡，將單車文化融入生活之中。 文：Travis 圖：蔡建新
「其實Cycling Cafe在歐洲好普遍，咖啡同單車都係日常生活一部份，車友可以自自在在坐低傾偈，比較出名有英國嘅Look mum no hands，我覺得香港都係時候有一間。」在單車界無人不識的Brian，早在2005年已率先引入Fixed Gear，掀起全城梗牙車狂潮。他說開設Cycling Cafe的意念萌生已久，由地點到飲品都經過精心挑選，「間舖由6個車友夾份，而呢度又係安和里6號，所以店名叫Velo 6，等人易記啲。呢度係小徑盡頭，車友可以踩車過嚟，巷仔又有泊車位唔會阻到人，可以慢慢睇下嘢飲番杯。」
妙手炒豆 教宗喜愛雪糕
Cafe的靈魂當然是咖啡，Brian與拍檔William除了特別買來意大利有名的Elektra三頭咖啡機坐鎮，更請來城中咖啡達人Edwin Lee為他們度身炒製Grand及House兩款咖啡豆，味道香濃，更備有獨立包裝可買回家。店中另一不能錯過的，就是首次到港、來自菲律賓的著名雪糕Carmen's Best，據說連教宗方濟各也喜愛！品牌創辦人是當地農場莊主Paco Magsaysay，雪糕選用自家鮮牛奶製作，他更遠赴美國學藝，終做出一流雪糕。本人就試過巴西咖啡口味，確係非一般軟滑，另還有黑朱古力、馬達加斯加香草、開心果、牛油胡桃等多款味道，在此奉勸車迷即使怕肥都咪走寶，寧願食完再踩多兩個圈補數。
極級配件 時尚功能兼備
作為車友聚首一堂之地，店內全方位散發單車狂熱：牆上大電視播放着單車電影、四周有搜羅自各地的單車書籍及畫作，更有Artist炮製的單車藝術裝置及紀念品，單單欣賞已經非常滿足。另外當然亦有不少極致級裝備供車友選購，包括獨家代理美國波士頓的Firefly，單是一個碳纖車架已索價逾五萬元，皆因輕身又堅硬，且是度身手造，為一眾專業玩家的至愛。配件方面亦不乏佳作，引入有氣泵界勞斯萊斯之稱的意大利名牌Silca，造型精美，真係泵氣都有型過人！至於服飾就有丹麥設計、意國裁縫縫製的Pas Normal，特別加有保護墊，時尚兼具功能性。
Velo 6
地址：中環安和里6號
查詢：2338 8900
↧