陳小春同應采兒自生了小春子（Jasper）後，一家三口經常在網上晒幸福，近日小春放風想同索妻追第二胎，仲話要增加親子時間，遂減少內地工作，留港湊仔！日前下午，小春果然坐言起行，當日小春夫婦同戴上黑超帶3歲仔現身圓方。唔知兩公婆係啱啱嘈完，定父子感情超級生疏？！陳大少全程面燶燶企埋一邊，遙距「監控」素顏妻貼身照顧乖仔，睇落好大男人！又話想同乖仔建立多啲親密關係，點解唔出手湊仔呀！山雞哥！ 採訪 : 李權威
昔日古惑仔近年變身慈父的陳小春，在內地發展多年狂掘金，早年又做埋惠州政協，鬼咁忙，湊仔大任就交由長腿索妻應采兒。咪睇33歲靚媽咪應采兒(丁丁)平時大癲大肺，這位80後辣媽平日好呵護愛子Jasper，出街抱完又拖，十級細心。近日陳小春承諾多留港爭取親子時間及「造人」，老婆丁丁亦話暫時不會接拍電影，非常配合。
當妻兒透明
日前下午四時許，陳氏一家三口現身圓方，49歲的美魔男小春穿上黑tee粗口字樣短褲及波鞋，睇落好young。丁丁亦慣性以熱褲晒腿出巡，鬼咁吸睛。兩公婆先帶「mini小春」去買了一袋玩具和文具，然後在商場閒逛。只見小春拎住袋戰利品，一副闊佬懶理模樣，不時一支公行先，遙距「監控」老婆湊仔。黑超丁丁去陣廁所，小春都無埋身拖吓個仔，由得好黐媽咪的Jasper係咁喊。
待丁丁步出洗手間，眼見心肝寶貝沿地喊無人理，即沒好氣急步返去o氹番愛子。而她行過黑面小春身邊，竟被老公當透明，丁丁嬲到面燶燶，兩公婆無交流如陌路人。最後丁丁抱起愛子，Jasper火速收聲，乖乖跟實媽咪。而小春卻keep住cool樣，在兩母子身後死跟。其間，小春發現記者，即惡形惡相行近記者說：「唔好再影呀！唔好再騷擾我湊仔！」喂！陳生！乜你有湊過仔咩？！
辣媽好正
近日，33歲索媽應采兒轉戰主持界，與Selina(任家萱)合作主持內地綜藝節目《撕人訂製》，以辛辣問題玩謝國民男神，丁丁仲集集晒長腿，大派福利！
↧