粵劇名伶陳寶珠，月前和梅雪仙主演的粵劇戲寶《牡丹亭驚夢》重演，叫好叫座後，寶珠姐開心謂騷後終於可以大吃大喝，唔使戒口。日前下午，68歲的寶珠姐相約女友人去銅鑼灣High tea。當日美魔女一身銀灰色潮裝，襯晒色出巡。歎茶後，寶珠姐仲將墨鏡架頭、搭住好姊妹膊頭去取車，人老心不老！點睇都唔似有個41歲乖仔經經囉！
娛樂圈的傳奇人物寶珠姐，早前在訪問中談到養生之道，就是近年愛上跳拉丁，她說：「主要係拉丁aerobic那種用來練氣，平日就早睡早起，食得清淡，做戲就會敷mask。」難怪年底69歲的她，睇落似50，身形又超fit啦。而離婚30多年的美魔女靚樣依然，但就抗拒搵第二春，話單身生活感覺好舒服。
日前下午4時許，愛自由自在的寶珠姐相約兩位女友人去銅鑼灣利園附近歎茶。當日寶珠姐全身銀灰色tone配件反領白色Polo tee，手拎一個約7、8千元的人氣手袋─銀灰色Bao Bao Issey Miyake手袋，再襯對厚底閃石鞋，淡妝加鮮紅色唇膏，仲要戴好晒耳環、頸鏈、戒指和手鏈等，好齊裝又modern咁靚靚現身。寶珠姐先和一女友人搵位，等埋另一女友來會合後，三人女人一個墟，食cake high tea個半鐘才滿足走人。之後，潮爆寶珠姐搭住老友膊頭、邊行邊吹水行去利園取車，傾到唔停口。
採訪 : 梁志明
↧
