上周五，韓團BEAST來港開粉絲見面會，唱歌跳舞又玩遊戲又同歌迷講吓笑咁，Fans開心到癲。翌日搭飛機返韓國前，組合三位成員龍俊亨、孫東雲及李起光撇低另外兩位兄弟去ifc行名店同買勞力士，戴住「金勞」嘅俊亨試「金鑽勞」，東雲亦有Follow齊齊試，不過只有俊亨買到心頭好。
雖然BEAST舊年都嚟過香港，但今次係成員張賢勝離隊後，組合首次以五人姿態來港，少咗個隊友，但仍吸引4,000歌迷捧場。面對全場米飯班主，BEAST好識做，用唔同招數冧歌迷。翌日離港前，三隊員去咗連卡佛睇男裝，揭吓五千蚊嘅衫，又望吓幾萬蚊一對嘅皮鞋，無嘢啱就閃。
見記者嬲豬
三成員加保鏢加工作人員加Fans幾十人由ifc行去四季酒店，全程霸晒條路都幾乞人憎，行行吓，俊亨直入勞力士專門店，隊友跟隨，本身戴住金勞嘅俊亨最有興趣，不斷俯身望錶櫃，睇啱就手指指示意店員拎畀佢試，半個鐘就入手一隻「新勞」。而起光無興趣，主力畀意見。買完行落去四季門口等車，隊員發現記者即耷低頭行，工作人員上前通知記者，「佢哋唔想影，因為係佢哋私人時間。」
採訪︰張詠森
↧
