年輕代理往往較難開單，但數名肯搏肯捱的「八十後」竟可以密開單，一連促成多宗新盤交易，甚至連砌「過億大刁」，由一貧如洗躋身有錢人行列。他們是來自不同區域的頂級代理，年紀最小的只得二十八歲，有人專攻細價樓或豪宅。他們入行時不被親友看好，為促成交易更要通宵瞓街「霸位」，終於得嚐苦幹後的成果，未踏入中年，卻能輕易暴發，揸BENZ買屋收租。
「代理予人印象都是讀不成書、份工不會做得長久，有朋友更話，求人買樓呢種事，佢肯定做唔出！」據《東周刊》報道，年僅二十九歲的香港置業助理營業經理石寶如（Bo），學歷中五程度，紥根將軍澳。早前區內新盤海天晉銷售時，她經手代客戶購入五個單位，成交金額約四千萬元。
Bo透露，今年個人營業額已突破七百萬元，她數月前購入了夢寐以求的全新BENZ，入行六年內第四度換車，未來更計劃買樓收租。不過入行初期，亦捱過底薪，她試過為準買家不惜瞓街霸位：「當時為咗幫客人搶到先到先得形式銷售的新盤，提早兩日就去排隊，夜晚就喺路邊瞓，好天曬落雨淋。」
代客瞓街霸位
元朗區為今年新盤供應重鎮，美聯助理區域經理張國成（Key）現年三十三歲，帶領團隊成功簽署朗屏八號三十張單，涉額逾一億六千萬元，首九個月累計，團隊營業額突破千萬元，他不諱言現時收入較年初低迷期，暴升十倍。
他憶述今年一月市況慘淡，整個團隊單月只有十餘萬營業額，「真係連租都唔夠畀」，為求開單，不時與同事到屋苑做Road Show，擺街站派傳單，經常在路邊食飯盒，「當時叫外賣，同餐廳講地址，就係邊個屋苑門口，或者邊個燈位。」談及後來新盤湧現，三月營業額按月倍升，Key笑逐顏開，形容現時是收成期。據業界人士透露，以Key的生意額，年薪逾百萬元是等閒事。現時Key正密密睇樓，希望晉身「包租公」行列。
↧