因為在熱播劇《城寨英雄》中飾演被強姦慘死的「鑫鑫」，23歲小花林穎彤（Bella）勁多人討論，成為新一代女神，廣告、商演陸續有來，一個月極速賺到六位數，搵到錢仲有錢剩，「鑫鑫」好滿足：「其實有冇能力置業，能否做女一亦唔重要，就算繼續做屋邨妹我都一樣咁開心，最緊要畀到單親媽咪一個安穩嘅生活，兩母女唔使再為錢擔驚受怕。」
採訪：方騫平 髮型：Green Cheung @ fifth salon 場地：Fitness First
林穎彤憑《城寨英雄》「鑫鑫」一角吸納好多Fans，唔少留言激讚表現出色，連帶工作量同收入都倍增。不過Bella上位後生活依舊，收工返屋企陪媽咪，唔使開工日子會去做運動，唔會亂使錢，繼續慳妹本色：「自細家境唔好，爸爸婚外情離家，留低兩姊妹同媽媽相依為命，媽咪母兼父職辛苦養家，所以我喺10歲開始做童星，中學時期做過眼鏡店Sales同Model半工讀幫補家計，17歲入TVB做藝員。好記得讀書時期長期被同學欺凌，同學唔Like我做Model，認定我扮晒嘢，上堂時會傳閱我影嘅Model相嚟品評，又拎住我做童星時嘅新聞去取笑我，對我冷嘲熱諷，雖然我好有性格唔理佢哋，但係唔好受嘅，所以喺學校冇乜朋友，平日只有一兩個『死黨』喺身邊。」
再提窮史仍然驚
2009年夢想成真入到TVB做藝人，原來係噩夢開始：「因為頭兩年得六千蚊人工，仲要畀半份糧媽咪做家用，乜都要慳住使，甚至要問朋友惜衫借鞋開工，有時拍完嘢藝人吹雞去Gathering，因為冇錢唯有返屋企，自然埋唔到堆；又因為冇錢搭的士，開夜索性留喺電視城度宿，就算唔太方便都冇法。做藝人唔係想像中咁簡單，係要帶錢打工，最𤓓一次計錯數，公司突然叫我糧尾日子開工，我連屋企去電視城嘅車費都冇，又唔想伸手問媽咪拎，最後要變賣張負數八達通卡，拎住僅有嘅46蚊做車馬費，窮成咁諗起都好鬼驚。好彩年前《愛回家》嘅『酸妹』救我一命，開始有搵錢Job接，呢啲額外收入漸漸改善生活環境，其實兩母女只係追求基本生活（家姐已出嫁），o依家媽咪生活安定，我已好滿足，暫時我仲未有能力置業搬離葵芳屋邨，反正我都住咗喺度23年，同街坊都好熟，唔怕品流複雜，唔少街坊仲喺媽咪面前讚我好戲。」
鍛煉體能好重要
對於「鑫鑫」得到大家喜愛，Bella話好開心。「有賴劇本、剪接同埋前輩演員嘅幫助，如果唔係劇中爸爸戲好做到夠賤格，大家都唔會覺得『鑫鑫』身世咁可憐。視后胡定欣好照顧我，除喺社交網站發文讚我做得好，拍完嗰場被輪姦戲，佢急急叫人畀條褲我披住下身先，怕我會凍親。最有印象拍拉鐵籠勇救爸爸嗰場，因為烈日當空，拍咗大半日終於體力不支，頭暈眼花幾乎暈低，嚇親定欣，當時劇組馬上扶我坐喺監製櫈，又斟水我飲兼且幫我捽藥油嚟救醒我，雖然休息一陣可以開番工，但經此一役提醒自己要好好做運動鍛煉體能，做文戲都咁吃力，第日接拍動作戲點算好？我希望將來可以試多啲唔同角色，好似做吓癲婆，甚至有機會唱吓劇集主題曲、做吓舞台劇等。」
↧