王灝兒（JW）轉投新公司一年繼續被力捧，早前憑頭炮主打歌《矛盾一生》唱到街知巷聞，公司乘勝追擊在月底（8月30日至8月31日）假九展舉行兩場《王灝兒JW Stage of Grief》演唱會，為省靚處女作招牌，JW不惜日日勤於排舞同做gym，搞到33C上圍大縮水，堅持女人要有肉地的JW自爆：「因為真係跌破底線，幾乎要買過晒啲bra，我真係堅驚，家陣唯有日日狂飲木瓜奶去谷胸啦！」
26歲的王灝兒（JW）惜「肉」如金，在月底的演唱會上，唔會隨便拋胸演出，但預言舞衣方面會凸顯女性身材美態，兼有性感迷人舞蹈，她自爆道：「原先舞蹈師想排個由女dancer摸我胸嘅動作，但父母都係席上客，驚嚇親佢哋而婉拒咗，其實我好思想保守，就算俾女仔掂都唔想。」
瘦身變「貧乳」
備戰個唱狂做健身的後遺症，搞到上圍縮晒水，JW大呻：「以前就算係瘦，上圍size係保持不變，我未試過咁樣（縮水），我係想keep fit減腩，可以再減磅，但唔係要『貧乳』，做女人要有前有後先會有女人味。」巨咪唔見咗，JW唯有日夜隊木瓜奶「救亡」，她說：「服裝師兇我話：『借到乜衫，有幾性感？就睇你嘅身形決定！』我都過咗25歲，露乜都得啦，只要唔露肚（腩）就得。」開騷在即，JW既驚又喜，除家人齊集打氣，好友們訂飛超過500張撐場。為求狀態大勇，即使身邊朋友咳兩聲，她都會敏感彈走，而且戒凍飲少食澱粉質。
採訪：方騫平
↧