香港奧委會會長霍震霆，月前同大仔兼中國香港代表團團長霍啟剛齊齊帶領港隊健兒殺去巴西里約奧運。前後逗留近一個月，出發前夕，本報在中環巧遇霍震霆，見他獨自行去中建大廈星級salon剪髮，多年來keep 住all back 「Mark哥」頭的他，在相熟師傅操刀下，三十分鐘洗剪恤，快靚正。
早前有報道指，在中環星級salon搵頂級髮型師Kim Robinson剪髮及挑染，埋單盛惠兩萬二蚊，整一次頭髮仲貴過普通打工仔一個月人工，咁誇！真係有錢人先負擔得到囉。
好似有錢有地位又有名譽的70歲霍震霆，多年來獨沽一味偏愛all back 「Mark哥」頭，日日gel頭就出得街，好鬼易打理。日前下午1時許，見西裝骨骨的霍生揀正lunch time去剪髮，他在太子大廈落車後，慢慢行去中建大廈二樓的星級髮型屋。洗完頭後，即開始剪髮。
剪完Chok行
雖然店外可以望向入面，但霍生全不介意，坐定定任舞，只係間中悶坐放蚊。齋剪短約一、兩吋，話咁快搞掂。霍會長火速戴番副墨鏡照照鏡，嘩！即時靚仔精神晒！再有人服侍霍生穿回西裝褸，大約一千蚊恤個靚髮，仲搵番自信心，算划算啦。所以霍會長步出髮型屋時，寧舍Chok又型。
採訪 ︰ 張詠森
↧
