英鎊低處未算低，準備去英國嘅朋友要留意喇！現時去英國旅行真係慳番唔少，儲落啲彈藥又可以買名牌。近來《華爾街日報》變身格價專員，引述研究報告發現同一款嘅LV手袋，英國售價平通街，比香港平成千八蚊！
報道引述德勤分析報告，比較過英國、法國、美國及中國四個國家嘅奢侈品售價。報告發現，如果以美元計價，英國售價最低。就以法國名牌LV的Speedy 30 Monogram系列女裝手袋為例，中國售價「超越英美」，定價最貴，賣1115美元，折合8653港元。
美國排第二，賣970美元，折合為7527港元。以為法國品牌喺法國買就最抵？少年你太年輕了！法國賣緊850美元，即係6596港元。真正最平嘅其實係英國，只售802美元，相當於6224港元。香港官網標價當然跟貼鄰近嘅祖國，索價8050港元。
英國脫歐累到英鎊大插水，瑞銀就發表報告話，英國因為咁變成全球買名牌至抵嘅地方。英國8月份外國遊客嘅高價貨品退稅額，更按年飆升36%，報告更指名牌粉絲將成為新一批強勢購買力。
中銀人壽開客服 老總開心血壓飆
棟篤笑都有話，最關注你健康嘅人，未必係你或你嘅親友，而可能係保險從業員，不過，保險從業員都有調轉「被關注」嘅一日。邊位？就係中銀人壽執行總裁老建榮（Terry）。話說噚日中銀人壽首間客戶服務中心喺銅鑼灣正式開幕，最大賣點係設有註冊護士，客戶可直接做身體檢查，最快24小時內有驗身報告，方便客戶投保咁話。
咁重要嘅里程碑，Terry當然到場主持開幕禮，仲即場試驗血壓，不過結果就嚇到中銀人壽嘅公關心跳加速，事關Terry嘅血壓超標咗少少，連護士都話「有啲高喎！」不過，Terry係第一次喺記者面前量血壓，量之前仲睇完舞獅，興奮加上緊張令檢驗失準都係正常情況，相信平時有做開運動嘅佢，身體依然健康。
仲有一樣開心事分享，Terry透露由於上半年氣氛唔錯，期內公司新做保費按年升約兩成，相信上升趨勢可以持續，亦會考慮喺其他地區開設更多客服中心。咁值得高興，難怪檢驗一時失準吧。
高瞻
↧