34歲嘅長腿「沈大師」沈卓盈(Jess)入行16年，近年來同家族經營內衣褲出口生意嘅富二代男友Calvin拍拖甜蜜蜜。有金龜照住，Jess去年尾同無線約滿後，瀟灑宣佈離巢，似ready嫁入豪門。自由身嘅佢日前下午現身闊太shopping勝地─中環ifc。見黑超沈大師買完一袋衫又去掃化妝品，擺到明hea時間等男友收工，學定做少奶奶囉！
沈卓盈入無線多年，代表作？講唔出，但就有一堆進擊情史，繼早年飛機師Simon、金融闊少Ray Mak，現任男友Calvin嘅父母住京士柏山獨立屋，每位非富則貴，難怪被標籤為釣金龜。日前佢突然喺社交網誌打咗篇千字文，同大台結束16年賓主關係。無大台遮蔭，Jess使乜驚呀！皆因佢身邊有個拍拖逾3年嘅有米男友Calvin，拍劇買花戴嘅佢，早已100%投入戀愛，不時孖男友四圍飛歎世界，更連續兩年歐遊，做見習少奶奶啦！
VIP室揀嘢
日前下午，無job一身輕嘅沈大師獨自去ifc行街街。戴晒黑超、口罩嘅Jess低調變搶眼，見佢行咗入間價錢大眾化嘅時裝店揀減價貨，唔通無男友陪買嘢，自己畀錢要慳住荷包？見佢慢慢揀吓紅色top、長褲等，買定新年着啩？！逗留逾半小時，才拎住兩件價錢分別都係百幾蚊嘅衫排隊畀錢。之後沈大師再去買化妝品，呢次似乎大出血，店員招呼佢入咗VIP室慢慢睇。半小時後，Jess同店員禮貌say bye，又多一袋戰利品走人。臨走前，精明沈大師仲先去取泊車優惠，才落車場取車離開。
採訪 : 張詠森
↧