17年6月，36歲嘅蔡卓妍(阿Sa)被傳媒拍到在麻雀館太子爺石恆聰(Anthony)的三億大宅兩度過夜，有相有片戀情正式曝光，難得阿Sa大方認戀，仲話「而家好開心。」熱戀快兩年，石生已完全融入阿Sa生活，不過女方一向崇尚拍拖寧畀人知莫畀人見，所謂低調保平安，所以呢對情侶行街Shopping，奉行唔拖唔攬唔黐住原則，眼神交流當然可以，不過，石生好有計，同女友揀衫時突然嚟一個輕觸式掃背，甜一甜精神晒。
去年中，瘋傳阿Sa年尾會結婚，阿Sa即在ig霸氣否認，強調自己有分數：「不需要你替我做主。」近日為宣傳題材大膽的新片《非分熟女》，阿Sa接受訪問時大方提到已結過一次婚，所以不急於再婚，現階段同男友關係，「非常良好。」更打算雪卵隨時生。
乜都問男友
今年3月，《非分熟女》被邀請出席第12屆荷蘭亞洲電影節，之後又會在香港上映要忙宣傳，加上阿Sa喺18年拍咗四套電影一套劇，有見及此，農曆年後她會同男友及朋友去旅行輕鬆吓。上周三下晝4點，戴咗口罩嘅阿Sa現身金鐘某尊貴商場，一個人喺售賣滑雪用品嘅Pop Up Store睇禦寒衣物，隔一陣男友現身，見阿Sa拎起任何一件貨，如保暖內衣定雪褸都會問男友意見，明顯兩人打算去滑雪，而男友有裝備但阿Sa無，所以要入貨。
摸吓女友背
不過呢，雖然係情侶，但阿Sa拍拖好低調，同男友揀衫期間唔拖唔攬唔搭膊頭，總之肉體零接觸，不過，Anthony都會唔覺意輕觸式掃一掃女友背脊，輕度溫馨吓。雖然阿Sa不斷進出更衣室，但最後只買咗保暖內衣，由男友找數，逗留40分鐘就離開。沿途兩人Keep住零接觸，阿Sa就不斷收發語音訊息，再慢慢行去停車場攞車離開。
採訪:李維隆
↧