做藝人每逢大時大節都會收到品牌送嘅禮物，方力申亦唔例外。日前晚上，小方喺父親開設的畫廊內拆禮物，有波鞋啦、護膚品啦、外套啦、星戰產品等等，可能佢想逐個單位多謝，所以每份禮物都影低佢，但小方絕對唔Hea影，鞋嘅擺位有晒構圖，退埋地應該可以做product shot。
採訪：梁志明、李權威
方力申唔經唔覺38歲，16年結束同鄧麗欣嘅十年情，女方已有台籍王子男友，小方就依然單身，但佢唔寂寞，事關佢同朋友搞咗間游水學校，截至去年十月已有1,000人次學游水，佢自己亦有300名學生。 教游水之餘佢仲有拍戲，最新作品有《你咪理，我愛你！》。
其實小方份人幾好，好孝順啦，因為每逢要開幾個月長工之前都會同屋企人去旅行，仲有愛心啦，成日做慈善，早前就以世界宣明會愛心大使身份去咗內地探訪小朋友，明顯筍盤嚟嘅。當晚六點，小方戴住口罩玩拆禮物，見佢拆完一份就放上枱影，影完包好再拆另一份，搞足個幾鐘先完成，雖然收禮物好開心，但拆完再還原都唔係易事，所以小方影到皺晒眉。
↧