女人對住咩特別醒神？當然係「小鮮肉」，就算對方唔係好靚仔，同埋只係個普通朋友仔，依然係開心嘅；無論係單身、有冇男友定已婚，或者咩年紀都好，呢個定律似乎唔會點改變。日前銅鑼灣超巿遇到47歲豹嫂（胡蓓蔚）同個廿幾歲四眼斯文男一齊，揀完面膜又買朱古力，全程勁high，雖然眾所周知豹嫂同豹哥（單立文）情比金堅，但有時見到好嘢想欣賞吓，都好正常嘅！
豹嫂同豹哥上世紀96年已宣佈拍拖，08年正式拉埋天窗，兩人由拍拖到結婚，足足相愛23年，人前人後一直好鬼恩愛甜蜜蜜，雖然兩人冇生B打算，依然無影響兩人關係，但畢竟已是老夫老妻，豹哥過多兩個月仲登六，豹嫂對得老公耐，有時有啲新刺激都唔錯㗎！
「小鮮肉」的神奇威力
日前下午7點幾，豹嫂同個「小鮮肉」四眼斯文男在超巿出現，最初兩人一齊揀面膜，豹嫂不時問對方意見，揀咗一陣終於搵到啱心水。之後他們再轉戰食品部睇嘢，豹嫂一個箭步就走埋去一間日本朱古力專門店度，佢再問個「小鮮肉」意見，但講到食朱古力，唔係個個男仔好，結果豹嫂都係靠自己，最終揀咗盒價值105蚊嘅榛子朱古力威化。跟住他們一齊去畀錢，個「小鮮肉」仲好乖豬負責攞晒啲嘢，之後佢哋再去攞車走人。全程豹嫂都笑得勁開心，仲細聲講大聲笑咁如沐春風，呢一刻「小鮮肉」嘅神奇威力完全體現。
↧