踏入2019，劉浩龍 （師兄）終於放假，約埋好友許志安等全男班去北海道滑雪。日前，充電返港嘅師兄精神奕奕現身會展寵物展，為一個新的寵物交友app做主持。當日，師兄化身寵物專家，又同現場嘅貓奴、狗奴互動吹水。其後，佢居然自爆無養寵物，全因為多年嚟童年陰影，搞到好鍾意狗仔嘅佢至今無膽做愛心主人。 採訪：李權威、林書鉉
劉浩龍去年歌影齊飛，在港開個唱之外，新一年亦希望將個唱帶去澳門，仲透露繼續歌影發展，拍多部網絡大電影。日前下午，師兄做番老本行，在寵物交友app攤位做星級主持，吸引唔少路過嘅貓奴、狗奴駐足參觀兼打卡，師兄仲乘機捉實fans做訪問，問對方有關養寵物嘅正確知識及心得等等，然後送上自拍神器做禮物。
當日客串做MC，師兄好興奮話：「我都係做主持出身，今次再做啲feel返晒嚟，好多謝大會邀請我，今年都希望有機會再過吓『MC癮』。」之後師兄仲賣口乖說：「雖然我無養寵物，但呢個寵物交友app好正，可以畀一啲有養貓貓狗狗，或其他小寵物嘅人喺網度po相、傾吓偈，分享心得嘅同時又可以認識新朋友，我已經推薦咗安仔（許志安）啦！之後再會介紹畀Eason（陳奕迅）等，佢哋有養狗好啱玩。」
問一向好鍾意小動物嘅師兄點解唔養寵物？佢講出苦衷話：「細細個養咗隻倉鼠，我好錫佢，豈料有一日放學回家，隻倉鼠死咗，我喊得好厲害，之後嫲嫲帶我將隻倉鼠葬咗。之後一直唔敢再養動物，好怕失去。希望如果有機會就養番隻狗仔啦！」
↧