外表的骰、個樣勁Young嘅55歲林珊珊，日前一連兩日忙裏偷閒去銅鑼灣時代廣場shopping。其中一日，見佢去首飾店揀耳環，珊珊試咗幾對耳環都心大心細，苦惱緊買邊對嘅時候，佢突然嘟嘴賣萌，年過半百都仲cute得起O架！ 採訪：梁志明
一講起林珊珊，就會想起佢同前夫李啟淦所生嘅兩個寶貝女李澄(西瓜)及李怡(野人)。30歲大女西瓜早年步阿媽後塵，入商台做DJ，一做8年，去年初無撈；而28歲幼女野人，鍾意喺社交網誌po泳衣相，仲因為曾經與崔建邦拍過拖，而為人熟悉。至於阿媽林珊珊呢？廿年嚟身邊人都係星級健身教練Michael(陳少松)，感情事低調嘅佢就專心做女強人，係草蜢、伊健等嘅經理人。
日前晚上7時許，見林珊珊獨自現身時代廣場一間首飾店睇耳環。平日口才出眾嘅佢，原來有選擇困難症，連試4、5對耳環，顯得心大心細。照照鏡幾分鐘都揸唔定主意，凍齡珊珊表情多多，突然嘟嘴賣萌，個樣勁可愛，少女心加晒分，唔怪得同兩個女全完無代溝，三母女似足姊妹咁friend啦！
另一日，珊珊又喺差唔多時間現身同一商場超市買餸。見佢買咗啲炸丸、蔬菜、熟蝦和雜色蕃茄仔等，多菜少肉，食得咁健康，唔通就係佢嘅凍齡秘方？！
↧