衛詩雅（Michelle）去年雖然未有新作推出，但其實接了多部電影，所以狗年可謂過得相當充實。展望豬年，Michelle將會有不少作品面世，相信人氣會繼續升，當然希望藉此搵多啲早日實現買樓夢想。34歲的Michelle更想快啲生BB，可惜工作狂的她仍苦無結婚對象，笑言想藉着這訪問公開招親搵男友。 採訪：撰文：杜淑霞 攝影：李維隆
服裝：MO&Co. 場地：The AIR（The ONE）
對於18年工作情況， Michelle覺得好滿意，雖然冇作品出街，但下半年工作排到密麻麻，「18年真係幾得意，上半年未有戲開，但係下半年就連開咗好多套戲，仲要係角色反差好大，好有女人味、甚至要加墊落胸圍僭建谷胸嘅，亦有好男仔頭、短頭髮勁多打戲嘅，試咗好多新嘗試，自己都好滿意。」
儲首期買村屋
展望新一年，Michelle會繼續努力搵錢買樓，「我鍾意同屋企人一齊住，想買間大啲嘅村屋，希望豬年可以儲到首期啦！」仲係單身的Michelle，另一個豬年願望竟然想快生B，「我真係好鍾意小朋友，不過未搵到對象，可能我太鍾意工作，又鍾意黐家，真係好難識男仔，或者你哋幫我公開招親，哈哈！」問到有何擇偶條件，Michelle就話首要支持她工作同愛錫她屋企人，「我真係好享受演戲，又好重視屋企人，最好結咗婚我兩家人可以一齊住，大家喺隔離屋有私人空間又可照應就正。另外，要鍾意小朋友同動物；同埋要Man啲大隻過我；仲有大家嘅興趣要似，譬如我鍾意揸電單，同埋鍾意睇驚慄片，佢都最好鍾意啦！」
↧