對於從來唔借錢嘅人來說，信貸評分高與低根本就唔重要，但對於要借助融資嘅人來說，呢樣嘢就好重要，如果你要知道自己嘅評分有幾多，原本要用280蚊向環聯購買，不過現時就可以免費獲取呢啲資料，因為一家名為Mtel嘅數碼技術公司，噚日就推出一個叫做CreditCheck嘅App，呢個App就好用囉，集結四大功能，包括查閱A至J級嘅個人信貸評分、獲取個人喺唔同金融機構嘅信貸帳戶概覽資料、提供債務重組及貸款結餘轉戶方案，以及具備還款提示功能的日曆及還款計算機。
香港能夠有啲咁筍嘅App，真係要多謝花旗銀行！點解？因為花旗舊年將Citi Mobile Challenge呢個創投項目嘅舉辦地點，伸延到亞太區，喺15個國家嘅決賽入圍隊伍所展示72項創新科技概念中，Mtel就憑住CreditCheck突圍而出，獲得呢個創投項目嘅「最佳理財方案」獎項。
花旗出錢又出力，噚日就向外公佈呢次嘅成果。不過，市民用呢個App查閱自己嘅信貸資料時，必須先註冊並經過嚴格的認識你的客戶（KYC）程序，好似會被問到有幾多張信用卡、信用卡屬邊個卡種，如果連續兩次輸入錯誤，戶口就會被封鎖，須向環聯聯絡。
港失落瑞士表出口寶座
有無覺得行尖沙咀少咗人呢？以前插針都插唔入嘅廣東道商場，仲有銅鑼灣羅素街一帶，都係名店林立，市道好景時不知幾多自由行「濕平」，但係近年已經無呢支歌仔唱，皆因內地經濟唔掂，連自由行嚟香港買「金撈」等名錶都少咗。香港一向都係瑞士鐘錶出口最大嘅地區，但7月份嘅數據就顯示，香港已經失去咗最大出口市場嘅地位，係近10年來第一次！
取代香港做瑞士鐘錶出口最大嘅地區，咪就係美國囉，不過話就話係最大地區，其實數字都係按年跌14.7%，但香港就跌得再誇張啲，按年大跌33%。
另外，有一個地區唔可以睇少嘅，就係英國啦，事關早排英國因為公投成功脫離歐盟，搞到啲英鎊係咁跌，啲遊客咪走去大舉掃瑞士表囉，淨係7月份出口到英國嘅瑞士表就按年升咗13.4%，所以唔好睇少英國嘅潛力。
高瞻
↧