近日無線劇集《城寨英雄》收視高開，造就配角都備受關注，其中演城寨惡霸馮春美胞弟馮夏滿的李嘉，將猥瑣、下流、卑鄙、賤格無惡不作行為發揮得淋漓盡致，尤其是「享用」鑫鑫（林穎彤飾）處子之身前飲生雞蛋，真係好變態！現實中武功了得的34歲李嘉，揚言唔介意做「二打六」，同埋大台「御用變態佬」。至於再做色魔、強姦戲又如何？他卻停了兩秒說：「我唔會推戲，但勸監製要三思，因為練功夫嘅人好難控制度力，我怕會傷及對手！」
入行17年，6歲起開始習武嘅李嘉，一身功夫考入無線動作特技演員訓練班，因傷患年前輾轉到幕前演出，但所演的角色都係動作閒角，較有印象係早年《巾幗梟雄之義海豪情》入面嘅日本軍人黑木少佐。至於《城寨英雄》奸到出汁嘅馮夏滿，雖然只得四集戲，就俾「龍成虎」伍允龍打死，但好有發揮，他興奮說：「網友喺討論區貼文，讚我奸得好，奸得萌！尤其是對林穎彤同劉佩玥起色心，好代表網友心聲！最搞笑有網民以為第5集係大結局，話馮夏滿死就無嘢好睇喇！證明我有捧場客。」
李嘉眼中的成功奸人係已故粵劇藝人石堅叔：「我師公係石堅叔同學，石堅叔有招牌笑容，不論語氣、節奏奸得好有特色，而且又係武術家，功夫一流，好受李小龍尊敬。」李嘉有好多拍戲難忘經歷開心share：「之前拍《火線下的江湖大佬》，黃光亮話我有做奸角潛質，可以放盡啲做江湖大佬，加上鄭則士主動出手幫我改對白，所以做得好入戲。」
採訪：方騫平 場地：九龍城周家螳鄉國術總會
↧