名模馬詩慧（Janet）生咗三個仔女，但身形依然Keep得好Fit，原來修身之道係做高溫瑜伽，同埋早食晚飯，咁就唔怕脂肪積聚。早前她同二女王麗嘉（Irisa）在銅鑼灣利園行完街，便相約大女王曼喜（Kayla）食街坊米線，之後食埋乳酪都只係八點，之後再去行街，散吓步幫助消化，夠晒健康。
雖然Janet上咗神枱無再行天橋，但由於她經常出席公開活動，所以脂肪不能多，要長期保持Fit Fit身形。一向少運動的她，幾年前開始做高溫瑜伽，她笑言每次做完都會出好多汗，既舒服又可以排毒。而食嘢方面就無特別減肥餐單，只係唔食牛肉，同埋最重要嘅早食晚飯習慣，有專家講過，早食晚飯能夠降低脂肪及血糖水平，同時促進新陳代謝，令身體更健康。
散步助消化
早前見Janet同細女Irisa喺利園行完街，便到23蚊有交易的「南記粉麵」醫肚，原來大女Kayla早已霸定位等媽咪同妹妹。三個人一邊食米線一邊傾偈，快食半個鐘就再去食乳酪，邊寧頓街嘅乳酪名牌llaollao是Janet的Favourite，只見Janet同Kayla好雀躍咁揀，但Irisa就無興趣，只企埋一邊撳電話。之後三人繼續去利舞台Shopping，不過行咗一陣見無心水就搭小巴返屋企。
採訪：梁志明
↧