劉小慧下嫁蘇志威後，一切以家庭為重，暑假當然是最佳家庭活動日，連百忙的蘇老闆，都會放下工作去旅行家庭樂。不過，今年暑假他們一家四口多了新活動，就是探望新買入的愛駒「駿王」。日前小慧跟一班小朋友為馬會本月27日舉行的《開季試閘樂滿FUN》活動宣傳，大談一家都是愛動物之人。
採訪：杜淑霞 髮型：Perry Law@Suave
場地：屯門公眾騎術學校
化妝：Yvonne Tang@PRIVATE I SALON
小慧當日跟四個小朋友先玩替公仔着衫扮靚，她即時慈母樣出晒來，不但跟小女孩玩得開心，跟小男孩一樣有講有笑。之後他們再一齊去騎馬，以及跟小馬仔玩，小慧同樣能令小朋友合作，果然不愧為兩女之母。
愛女有動物緣
談到暑期節目，小慧認為重點項目是旅行，「老公平日工作好忙，又要成日飛，好難夾到時間去旅行，暑期就容易遷就好多，暫時都係去東南亞近近哋嗰啲，不過我哋一家都好鍾意動物，最想去非洲睇動物大遷徙，但要配合好多嘢，或者等細女大個啲先得，同埋近距離去睇，費用都唔平，o依家儲多啲錢先。」
講到愛動物，小慧透露一對囡囡比她和老公更甚，「屋企有養開藏獒呢啲大種狗，兩個女由細到大都好鍾意動物，特別係大女，啲狗有事就會入佢房，佢想讀埋動物傳心術，但得17歲要遲啲先得。9歲細女就成日話想學騎馬，老公最近仲做埋馬主，隻馬叫『駿王』，我哋成日探佢，佢好有靈性，任我哋摸同錫㗎！」
↧