近排林夏薇成為新聞人物，因為有報道爆佢老公莫贊生嘅情史，但莫太回應得好，「每個人都有過去，冇咩好介意。」請為莫太鼓掌。有老公錫又有錢又靚嘅林夏薇無受報道影響，行過街邊檔仲笑笑口買30蚊就有交易嘅頭箍，好知慳識儉呀。
去年七月，林夏薇下嫁身家逾二十億嘅金融才俊莫贊生，隨即入住老公位於山頂柯士甸山道，市值逾十億的的獨立屋，榮升闊太令不少大台姐仔好葡萄，不過，早前忽然被爆舊情史，指莫生曾力追陳慧琳、鍾嘉欣但追唔到，又同過Donut前成員Caroline拍拖3年，男方仲好愛Caroline，更指莫太嘅愛犬原來係老公同舊愛嘅「定情狗」。不過林夏薇有備而戰，出口護夫，「我同老公識咗好耐，每個人都有過去，唔使諗咁多，亦冇咩好介意。」至於「定情狗」嘛，林夏薇答得小心：「養狗要有愛心，而且隻狗最黐我。」完美KO，可以Close File。
興奮買平貨
當日傍晚，一身白同孭住粉紅Chanel袋嘅林夏薇同女友人去銅鑼灣行街，途經全街都是檔口嘅渣甸坊，望兩望就行入去，見到擺賣頭飾嘅檔口即停低，好認真咁望住掛喺牆嘅頭箍，揀揀吓又摸吓口唇又或𢱑吓條腰，唔使幾分鐘就揀到心頭好，埋單30蚊，笑住畀錢嘅莫太都不知幾開心，老公舊情史？莫太都唔係第一次拍拖就嫁畀莫生啦。
採訪:梁志明
↧