肥媽（Maria Cordero）同「契仔」陸浩明（6號）主持嘅無線節目《今個夏天食平D》有大量捧場客，平均收視都Keep到20點以上，因為有唔少師奶like爆，形象夠入屋，近月肥媽接job接到手軟，已拍咗3個廣告，另外登台、商演超過30個，進帳以百萬計，對於半退休的肥媽來說既驚又喜，「真係意外收穫，我仲帶挈埋『6號』搵到老婆本，打算明年置業兼結婚，o依家等緊飲新抱茶。」
日前肥媽為富麗華珠寶金行周年晚宴演出，仲拉埋美加登台好拍檔「黑妹」李麗霞上台又唱又跳《白金升降機》掀起全場氣氛，肥媽不忘電暈老公示愛話：「老公，I Love You！」老公喺台下睇到拍爛手掌。眼見大量師奶觀眾在場，肥媽乘機分享做精明主婦心得：「女人買餸梗係要打斧頭啦，唔係點樣去貼個家呀，呢啲叫用自己拳頭打自己個咀。」現場觀眾拍手叫好，見咁好反應，金行老闆們笑晒大讚肥媽好嘢。
觀眾追問邊度買食材
肥媽話做今輯原意都係繼續發揮慳錢大智慧，教觀眾喺夏日「食平D」，好似推介「平民燕窩」拉絲雪燕、取代牛肝菌嘅素菜料「油牛肝菌」等，始料不及迴響咁大：「o依家日日都有觀眾追問我『平民燕窩』喺邊度買？連韓瑪莉同埋一啲海外朋友都問埋一份；有啲觀眾要求添食，不過監製張志明話今年節目排晒播映日期，最快明年先可以Encore，其實今年『食平D』系列都做咗成60集，但仍然俾觀眾追住鬧話唔夠喉。」
商演登台Show接唔停
食住節目熱潮，好多商演、登台Show向肥媽招手，最搞笑私人宴會除邀請肥媽唱歌之外，仲要求她表演煮兩味，意外地殺出一個商機。雖然減產唔成，但肥媽堅持半玩半做，跟黑妹去美加登台期間順道打高爾夫球，抱住輕輕鬆鬆心態去工作。肥媽笑說：「我喺節目度成日鬧『6號』衰仔，佢做下把俾我鬧，有時又整蠱我帶動到唔少氣氛，母子檔咁先好玩，觀眾又會睇得開心。」
採訪：方賽平
↧