殿堂級歌手林子祥，今年踏入入行40周年大日子，阿Lam即開演唱會慶祝一番。完成香港、澳門個唱，下月會到東莞，展開巡唱第一站。日前一連兩日，本報在中環太子大廈先後兩次巧遇阿Lam，他兩日下午都愛在同一書店打書釘，免費娛樂近半小時，就雙手fing fing走人。似乎習慣早睡早起的阿Lam，唔鍾意留喺屋企喎！
下月中就69歲牛一的林子祥，近年來開始在樂壇活躍番。下月，他將展開內地巡唱，透露在東莞首站會獻唱《數字人生》、《分分鐘需要你》、《在水中央》等45首經典之作，也是粵語歌曲最多的一站。
內地個唱即將開鑼，好好氣嘅阿Lam唔去練歌，反而在中環輕鬆出巡。日前先後兩日下午，見阿Lam去太子大廈的書店睇雜誌。頭一日，黑tee黑褲林子祥在書店買了兩本外國雜誌，出門口時遇到一位操普通話的婦人，似係舊朋友，兩人傾講幾分鐘，婦人就問阿Lam攞電話，之後阿Lam就行去附近取車返家。
另一日下午6時，阿Lam穿西裝四正再現身同一間書店，見他戴上眼鏡在店內睇外國車書，揭兩揭唔夠喉，索性坐低慢慢睇，悠閒鋤書近半小時，才滿足離開，然後行去文華東方酒店，搵人食飯。
採訪 : 張詠森
↧