最近新劇《超能老豆》由準新郎陳智燊（Jason）和網民封為「御用癲婆」的趙希洛，演有一對分別7歲和5歲仔女的小夫妻，兩人直言當實習做父母，特別是年底榮升宋熙年丈夫的Jason，打算婚後努力造人。而希洛很高興今次不做癲婆改做賢妻，還笑言「筍盤」陳智燊即將封盤，要求他在婚禮介紹「新盤」。
這次是Jason和希洛首次演一對，訪問時見他們十足十歡喜冤家，就知合作好愉快。Jason說：「我哋真係好多對手戲，成日有一家人嘅戲。」希洛說：「場場都係同佢一齊，大家真係熟絡咗好多㗎！佢係筍盤嘛！」
生得愈多愈好
近期忙於跟未婚妻宋熙年籌備婚禮的Jason，雖然過程有些小拗撬，但無損兩人甜蜜程度，Jason坦言當這次跟兩名小演員相處，視為實習做老豆，「我不嬲同小朋友相處都OK，今次當係實習埋囉！反而我唔知照顧BB得唔得，我希望生得愈多愈好㗎！（老婆知未？）佢都鍾意小朋友，但未傾生幾多個嘅。」
談到今次不用做癲婆，希洛笑言對於被封「御用癲婆」，反而高興，「證明自己演出有人留意，其實做咩角色冇所謂，有得發揮就得啦！」今次做賢妻有網友想娶她做老婆，現實中還搵緊真命天子的她，笑言要搵Jason介意，「佢又封咗盤啦！我等去佢婚禮希望佢介意啲兄弟畀我，應該都差唔多水準啦！」
撰文：杜淑霞
↧