早年進軍內地的孫耀威，今年決定將所有事業「回歸」香港，早前接連拍了兩部港產片，大嗌好滿足。日前，剛成立工作室的孫老闆去圓方為新片《此情此刻》謝票。見一早到場的他，先同女助手去食tea醫肚，其間孫老闆雙眼睇住部iPad，左手又同時玩緊部新手機，加埋枱上部手機，一心三用，好似處理緊啲大生意喎！
早前，43歲美魔男孫耀威透露剛成立工作室，仲話手頭上有七個劇本，由實驗電影到賀歲片都有，希望可以做導演，之後又會出廣東歌及開設時裝店等等，N咁多個大計，難怪與35歲同居女友陳美詩拍拖7年，都未有確實婚期啦！
日前周末下午4時許，連日忙為主演的新戲《此情此刻》四出謝票的孫耀威，當日中午跑完新都城，再落去圓方戲院。由於早到個半鐘，老孫先同女助手去戲院附近，搵間餐廳食tea。
老孫又主動排隊買嘢食，仲幫助手買埋一份，幾咁親切。等食其間，他即攞出部iPad睇嘢，同時間拎部新iPhone出嚟玩，加埋自己部手機，同時一心三用，睇落好鬼忙。唞到6點鐘，較啱時間去戲院會合其他演員。
半小時後，見林家棟急步早走，然後一眾謝票演員步出，穿上反光黑tee的孫耀威，與Eric Kwok（郭偉亮）夫婦等有講有笑同行，最後分頭取車走人。
採訪 ︰ 李權威
↧