「翠如BB」黃翠如加入TVB以來，跟黃浩然合作無間，10套劇中有4套做過拍檔，難怪兩人感情特別好。日前黃浩然同翠如去溜冰時，個鼻突然撞爆缸，翠如即時好溫柔咁幫男方抹鼻血。不過這只是《我瞞結婚了》劇情需要，蕭正楠唔使驚！而戲中浩然仲要同「真老公」洪永城拗手瓜爭翠如O添！
當日下午1時許，圓方溜冰場好多人玩緊，翠如和浩然就有私人教練——公仔傍住溜冰，不過見翠如仲有個私人女教練照顧住，就知佢真係唔多識玩，當佢見到同場小朋友都係扶住隻公仔行時，搞到佢表情都有啲尷尬㗎！
浩然有風度
之後翠如和浩然拍攝在溜冰場玩，兩人好似情侶咁，仲一度玩到坐晒地，浩然又不停搣翠如塊面，相當搞笑。拍攝完，浩然好有風度扶番拍檔翠如起身，接着兩人企埋一邊，工作人員遞上一支紅色藥水，浩然拿來搽上鼻，搞到成個鼻仔紅鬼晒，好似腫咗咁款，睇真啲應該係扮撞親。
接着正式拍攝，講翠如即時攞紙巾幫流鼻血的浩然抹，當時翠如一臉溫柔，唔知平時係咪都係咁樣對老蕭（正楠）呢？其實呢個新劇講翠如跟洪永城為在公司生存而玩瞞婚，而身為公司太子爺的浩然就冧爆翠如，於是在不知情之下走去追人妻，當然三角關係搞到好複雜。之後點？到時煲劇啦！
採訪：李權威
↧