嫁個有錢人的凍齡靚媽黎姿，過幾日「十‧一」國慶日就踏入45歲牛一，但三女之母睇落依然嫩口超靚，保養得宜。日前下午，愛美神媽咪黎媽媽，戴黑超獨自現身銅鑼灣，見闊太穿梭一間專賣平價手機配件的「雜架攤」，睇中手機托、保護貼等，每樣十蚊、廿蚊，揀得興起。估唔到有個億元女婿馬廷強的她，現實生活咁慳家喎！
幸福少奶黎姿，08年嫁予富商馬廷強後，生活極低調。2010年，人妻以38歲高齡，誕下孖女家蔚和家鎂，12年再誕下幼女Pegella。馬廷強對愛妻絕不吝嗇，先獎七千呎的複式單位作愛巢；生孖胎時再送價值一千五百萬的六十二呎豪華大遊艇，孖女一歲又送地利根德里的二千多呎豪宅等，令黎姿眨眼就「進帳」過億。
多得黎姿父母，生個標致靚女入行，令fans大飽眼福。日前下午，黎姿母親獨自落銅鑼灣shopping。年約七十多歲的黎母，白衫褲加冷外套加披肩，再戴番副墨鏡，衣著光鮮。闊太平日食好住好，但老人家始終鍾意買雜物，仲要每件5蚊起，黎母即拎出個大大個粉紅色環保袋，興奮掃貨。她在「雜架攤」內專揀手機配件，手機座、手機托等，連夾在手機上影相的廣角鏡頭仔都買埋，黎Auntie都幾潮。「大客仔」乜都買，女店員貼身服侍，黎太仲大把時間，同店員有講有笑，同愛女黎姿一樣，全無架子。
採訪 ︰ 梁志明
↧