市道低迷，「視帝」黎耀祥股票投資失利損失6位數字，加上負擔寶貝仔正橋龐大嘅留學費用，最近祥仔密密接Job「跑數」。上周他再到深水埗一間街坊酒樓唱歌搵錢，載歌載舞娛賓，觀眾反應好high。他坦言因為經濟唔好香港嘅job明顯係少咗，唯有放眼內地同美加：「搵錢嘅嘢隨緣啦，觀眾鍾意睇咪做囉，只要兩餐溫飽供到個仔海外升學就滿足喇。」
當晚祥仔為富麗華珠寶金行周年晚宴出任其中一位演出嘉賓，他演得好落力，除獨唱《前程錦繡》、《倚天屠龍記》及分別用李克勤、盧冠廷腔唱出《舊歡如夢》外，更跟朱咪咪合唱《射雕英雄傳》主題曲《鐵血丹心》及《成吉思汗》主題曲《問誰領風騷》，觀眾睇到拍爛手掌，搞㷫全場氣氛。最抵死咪咪姐話見到祥仔起痰要飲杯水，祥仔笑住回應：「梗係你哋好耐冇返香港冇見過靚仔！」咪咪姐又搵祥仔「找數」：「2011年時佢做我演唱會嘉賓時承諾過，第時佢開演唱會時請返我做嘉賓，係咪要等到2047年？」祥仔笑說：「你估咁易喺紅館開到演唱會咩？」咪咪姐隨即宣傳埋農曆年初7嘅紅館個唱，聲稱今次可能係最後一次香港演唱會。
唔想呃觀眾
對於紅館開Show，祥仔形容係一個非常任務：「開演唱會要準備20-30首歌唔係打牌咁易，不過早年張耀榮喺度時，睇完我做朱咪咪演唱會嘉賓就力邀我開個唱，仲教我只唱10首8首歌都得，其餘時間可以搵嘉賓助陣，但我始終覺得自己以演戲為主又唔係歌星，唱來唱去都係嗰幾首飲歌，咁樣開一個買飛Show好對唔住觀眾，紅館個唱就緣慳一面啦。」不過，祥仔坦言未來都想試多啲嘢，好似拍完《8時入席》後明年初開始為《風雲5D音樂劇》排練：「可能遲啲真係會舉行個人演唱會呢，隨緣，開住期票先啦！呢個世界話唔埋，好似我10幾年前做過泥菩薩，冇諗過今時今日喺音樂劇中再演。」
採訪：方騫平
↧