38歲的無線筍盤陳智燊（Jason），與07年國際中華小姐冠軍、年輕8載的女友宋熙年（Sarah）鐵定12月在港大婚。早前有傳新人將於下月先去男方家鄉英國行禮，近日準新娘就四出張羅嫁妝。日前下午，Sarah搵來姊妹團之一的龔嘉欣行中環ifc。兩女分頭睇護膚及化妝品，再一齊High Tea。臨近大婚的準新娘淡妝都好省鏡，Jason好識揀囉！
男神陳智燊近來被大台力捧，「中鮮肉」劇接劇，近排在熱播劇《超能老豆》做湊仔公，演出生鬼。老公拍劇搵定奶粉錢，準陳太Sarah就主力籌備婚事。早前被踢爆6月已入紙排期註冊的Jason和Sarah，一直表示12月在港擺酒大婚，下年再在英國和澳洲擺酒。不過日前有指二人下月將先去英國行禮，一班姊妹團包括高海寧、李亞男、陳爽、龔嘉欣等，都會隨團出發。
日前，準新娘相約好姊妹龔嘉欣結伴Shopping。兩女在ifc一見面即熱情擁抱，「樹熊姊妹花」互攬片刻才肯分開。然後雞喙唔斷去買嘢。是日兩女主打買護膚及化妝品，先行連卡佛的Beauty Counter，再行去附近的護膚品店再揀。為爭取時間，二人分頭行事，各有各睇心儀的化妝品。見嘉欣在店內試完護膚品，即爽手碌卡找數。約十五分鐘後，快手買了袋咖啡粉的Sarah，約好姊妹在Coffee Shop等，請嘉欣歎咖啡，再坐低慢慢傾婚禮事宜。
採訪 ︰ 李權威
↧