16年，楊愛瑾(Miki)同拍拖9年嘅永安集團太子爺郭永淳結婚，正式成為闊太，結婚半年就宣佈佗B，囝囝Luken眼好大，成個迷你版Miki。幸福一家三口去年尾發生變化，事關Miki三年抱兩，豬B將於6月出世，不過Miki無偏心，唔會剩係掛住買初生bb嘢，日前就見到佢去咗梁詠琪開設嘅西班牙童裝店買衫，全程揀for哥哥嘅衫，快揀15分鐘入手可愛小外套一件。 採訪：李權威
自從有咗ig，所有明星藝人都好鍾意喺ig公佈喜事或宣佈分手，Miki在ig宣佈大肚後，第二胎見肚照同樣放喺ig。Miki由去年聖誕前開始已身處美國度假兼養胎，身材仲因為佗B而升cup，總之全身散發幸福味。而佢話佗第二胎較第一胎辛苦，因為Miki要同時照顧大仔，唔可以隨時瞓。
梁詠琪嘅VIP客
日前下午4點半，着住乾濕薄褸同平底鞋嘅Miki去銅鑼灣希慎道名店林立嘅商場行街，見佢一到即直上梁詠琪開嘅童裝店，入內兜咗兩個圈就有心水，見佢揀上手嘅衫都係for兩至三歲嘅小朋友，明顯買畀大仔，快揀15分鐘就搞掂，見佢同店員好好傾，應該熟客嚟嘅，離開時見到記者，郭太溫柔地笑一笑打招呼，然後慢慢行出商場，司機揸嘅車已等候。
↧