「凍齡男神」呂良偉上月踏入62歲，但外貌長青，fit過唔少中佬。日前下午，美魔男做family man陪愛妻楊小娟和兒子善揚去中環Shopping。只見17歲囝囝好有Daddy嘅大將風範，除咗保護媽咪逼入超市，又出手攬攬母親，呢位「前世情人」化身私人保鏢對至愛呵護備至，唔怪得阿呂咁放心，自己喺門外等啦！ 採訪 : 張詠森
內外都Keep得好fit嘅呂良偉，勤做運動又練功夫，佢仲將多年養生心得放喺生意上，去年投資千萬開設抗衰老及健康管理中心，嚟緊仲會喺內地主要城市開分店，盼3年內達到上市當CEO嘅目標。
資優仔返港度假
事業發大嚟搞，但「愛妻號」阿呂都會抽空陪吓老婆。日前下午，阿呂嘅仔仔善揚由英國返港度假，一家三口就陪長輩去中環ifc歎茶。喺英國劍橋留學嘅17歲善揚份量十足，一行人high完tea，阿仔就陪母親入超市行孖咇買餸，阿呂好放心企喺門口玩手機等。半小時後，兩母子畀錢走人，成架購物車full晒，乖仔獨自拎晒兩大袋餸，媽咪小娟就負責拎袋麵包啦！然後，阿呂等人行過隔離酒店取車，美魔男做「柴可夫」司機載家人離開。
↧